¹ Ул көннәрдә Яһүдия чүленә Чумдыручы Яхъя килде.

² Ул:
– Тәүбә итегез, Күкләр Патшалыгы инде бик якын! – дип игълан итте.
³ Ишагыйя пәйгамбәр:
«Чүлдә әнә бер аваз яңгырый:
„Раббыга юл әзерләгез,
Аның барыр сукмакларын турайтыгыз“», –
дип, Яхъя турында әйткән иде.
⁴ Яхъяның өстендә дөя йоныннан хәстәрләнгән кием, ә билендә күн каеш иде. Ашаган ризыгы саранча һәм кыр балы булды.
⁵ Аның янына Иерусалим халкы һәм бөтен Яһүдия белән Үрдүн буе төбәгендә яшәүчеләр килә иде.

⁶ Килүчеләр үзләренең гөнаһларын таныдылар, һәм Яхъя аларны Үрдүн елгасында чумдырдыc.
⁷ Суга чумдырылырга дип, күп фарисейларның һәм саддукейларның килүен күреп, ул аларга:
– И-и сез елан токымы! Башыгызга төшәсе Аллаһы ачу-ярсуыннан качып котыла алырбыз дигән фикерне кем әйтте сезгә?
⁸ Тәүбәгә килүегезнең ихлас күңелдән икәнен эшегез белән раслагыз.

⁹  «Атабыз Ибраһим бит, котылырбыз!», – дип кенә уйламагыз. Сезгә әйтәм: Аллаһы әнә шул ташлардан Ибраһимга балалар бар кыла ала.

¹⁰ Агач тамыры янында балта әзер ята: яхшы җимеш бирми торган һәр агачны кисеп утка ташлыйлар.

¹¹ Мин, тәүбә итүегезнең билгесе итеп, сезне суга чумдырам. Әмма артымнан Килүче миннән кодрәтлерәк. Мин Аның аяк киемнәрен күтәреп йөрергә дә лаек түгелмен. Ул башкарган чумдыру Изге Рух һәм ут белән булыр.

¹² Аның кулында җилгәргеч. Ул, ашлыкны ындырда җилгәреп, бодаен, аерып, келәтенә салыр, ә кибәген сүнмәс утта яндырыр, – дип әйтте.
Гайсәнең суга чумдырылуы
¹³ Шул вакытта, Үрдүн елгасында Яхъя тарафыннан суга чумдырылу өчен, Гәлиләядән Гайсә килде.

¹⁴ Яхъя исә, Аны туктатырга тырышып:
– Син мине чумдырырга тиеш, ә Син миңа килгәнсең! – диде.
¹⁵ – Хәзер шулай булсын. Без Аллаһының гадел ихтыярын шулай итеп үтәргә тиеш, – диде аңа Гайсә.
Шуннан соң Яхъя риза булды.

¹⁶ Гайсә, чумдырылып, судан чыккач ук, күк капусы ачылып китте, һәм Ул Үзенә Аллаһы Рухының күгәрчен рәвешендә иңүен күрде.

¹⁷ Күктән:
– Бу – Минем сөекле Углым, Ул – Минем куанычым, – дигән тавыш килде.

Изге язма